Կազմը՝ դաջազարդ կաշի՝ դիմային հատվածում անկյունանախշերով և խաչապատկերով:

Պարունակում է 8 փորագրապատկեր, որոնցից մեկն՝ անջատ:

Ընդհանուր ծավալը՝ 378 էջ (Գրքից պակասում է մի քանի էջ. Բնօրինակն ունի 400 էջ)

Չափսը՝ 7.3×11.3 սմ

Տպագրությունը՝ Կոստանդնուպոլիս, Յոհաննիսի և Պողոսի տպարան:

Տպագրության տարեթիվը՝ 1780 թվ. , փետրվարի 7 (ՌՄԻԹ)

Գտնվում է լավ վիճակում։

Սաղմոսարանը՝ Սաղմոսաց գիրքը, Հին կտակարանի ամենատարածված գրքերից է, բաղկացած 150 գլխից: Գիրքը եբրայերեն կոչվել է Թեհիլլիմ, որ նշանակում է փառաբանություն։ Քնարական այս օրհնությունները եբրայեցիք երգել են քնարի կամ տավիղի նվագակցությամբ, այստեղից էլ՝ սաղմոսարան բառի երկիմաստությունը, նախ՝ սաղմոսներ պարունակող գիրք և, երկրորդ, նվագարան։ Մարգարեները նկարներում միշտ պատկերվել են քնարով, որը սաղմոս է խորհրդանշել։ Միջին դարերից սկսած սաղմոսարան հայերն օգտագործել են իբրև դասագիրք։

Միջին դարերում Սաղմոսարանը իբրև առանձին գիրք ընդօրինակել են բազմաթիվ հայ գրիչներ։ Մատենադարանում պահվող ավելի քան 150 ձեռագիր Սաղմոսարաններից ամենահինը 1298 թվականին գրված ձեռագիրն է: 1565 թվականին Աբգար Թոխաթեցին Վենետիկում առաջինն է տպագրել հայերեն սաղմոսարան։ Այնուհետև մինչև 1800 թվականը սաղմոսարանը ունեցել է 115 հայերեն հրատարակություն, որոնցից մեկը հենց տվյալ Սաղմոսարանն է:

Դավթի սաղմոսները աղոթք-երգեր են և մարգարեություններ, ունեն կենդանարար, առողջացնող, ոտքի կանգնեցնող, հոգի նորոգող զորություն: Առաքյալներն իրենց կանոններում պատվիրել են, որ եկեղեցում պաշտամունքի ժամանակ Դավթի սաղմոսներն ու օրհնությունները ասվեն, պաշտամունքը կատարելով օրըստօրե և ամեն ժամ: